Filwaqt li t-tagħmir tal-gass jipprovdi l-utenti b’alternattiva affordabbli għal tagħmir elettriku, dan it-tagħmir irid ikun mantenut sew biex tissalvagwardja s-sigurtà ta’ dak li jkun. Infatti, apparti milli tara li meta qed tixtri tagħmir tal-gass ikollu l-aħjar karatteristiċi ta’ sigurtà u li jkun installat fil-post minn persuna professjonali, hemm affarijiet oħra li wieħed għandu jara li jiċċekkja perjodikament.
Ir-regolatur
Huwa importanti li kultant żmien tiċċekkja r-regolatur tat-tank tal-LPG. Ara li tibdlu jekk f’xi ħin juri xi sinjali ta’ ħsara jew jekk għal xi raġuni m’għadux jintlibes sew fuq iċ-ċilindru. Kull darba li tibdel iċ-ċilindru tal-gass ara li ma jkunx hemm tnixxijiet. Dawn ir-regolaturi għandhom jinbidlu kull 10 snin. Meta tħaddem ir-regolatur, ara li timxi mal-istruzzjonijiet li huma pprovduti mill-manifattur fuq il-karta tal-istruzzjonijiet.
Il-pajp
Element ieħor li għandek toqgħod attent għalih huwa l-flessibilità tal-pajp li jintuża biex titrasferixxi il-gass miċ-ċilindru tal-LPG u r-regolatur għat-tagħmir tal-gass tiegħek. Ara li tagħmel użu biss minn pajpijiet li huma ċċertifikati u li għandhom miktub fuqhom is-sena tal-manifattura u l-isem tal-manifattur. Ara li l-pajp ikun qasir kemm jista’ jkun u li jkun imqabbad permezz ta’ klipep tal-pajpijiet apposta. Malli l-pajp jiskadi (ħames snin mid-data tal-manifattura), ara li tibdlu minnufih. Wieħed għandu jibdel il-pajp ukoll jekk dan juri xi sinjali ta’ qsim jew ħsara. Finalment, huwa importanti li qatt ma tixgħel fjamma diretta biex tikkonferma jekk hemmx tnixxijiet.
X’għandek u x’mgħandekx tagħmel biex tassigura li l-użu taċ–ċilindru tal-LPG u t-tagħmir tal-gass huwa sikur
Issa li taf x’għandek toqgħod attent għalih biex tassigura li r-regolatur u l-pajp qed jaħdmu tajjeb, nistgħu nħarsu lejn diversi punti li għandek tagħmel, jew li għandek tevita li tagħmel biex dejjem tuża l-gass u t-tagħmir tiegħu b’mod sikur.
Meta qed tuża ċ-ċilindru tal-LPG għandek tara li:
- Tieħu ħsieb iċ-ċilindru u l-valv biex taċċerta li m’għandhomx ħsarat.
- Tuża’ ċ-ċilindru fil-pożizzjoni korretta.
- Taqra l-istruzzjonijiet li jiġu mat-tagħmir li juża’ l-LPG u tpoġġi dawn l-istruzzjonijiet x’imkien fejn faċli ssibhom f’każ ta’ bżonn.
- Żżomm t-tagħmir nadif u ara li jsirlu servizz minn persuna professjonali xi kultant.
- Tpoġġi t-tagħmir fi spazju fejn hemm aċċess tajjeb għall-arja friska. Jekk it-tagħmir jinżamm fuq ġewwa, kemm jista’ jkun ara li tpoġġieh qrib ta’ tieqa (dejjem itlob il-parir ta’ venditur jew installatur awtorizzat għax hemm restrizzjonijiet fuq l-istallazzjoni ta’ ċertu tipi ta’ tagħmir bħal fi kmamar tas-sodda jew kmamar tal-banju).
- Tibdel ċilindru vojt ma’ wieħed mimli fuq barra. Jekk tasal li jkollok bżonn tibdel iċ-ċilindru fuq ġewwa ara li t-tagħmir huwa mitfi u li bired sakemm tiġi biex tibdel iċ-ċilindru.
- Tiċċekja li r-regolatur huwa mqabbad sew u li m’hemmx tnixxija ta’ gass.
- Tirritorna ċ-ċilindri lill-fornitur meta jkunu vojta jew li ma jkunux intużaw għal żmien twil.
Intant, hemm diversi affarijiet li wieħed m’għandux x’jagħmel biex jaċċerta li l-użu taċ-ċilindru tal-LPG huwa wieħed sikur…
- M’għandekx tesponi ċ-ċilindru għas-sħana ta’ fjamma diretta.
- M’għandekx tipprova taqla’ l-pajp minn maċ-ċilindru jekk il-fjamma ma tintefiex meta r-regolatur huwa mitfi.
- M’għandekx tpoġġi jew tuża ċ-ċilindri fi kmamar magħluqa jew taħt l-art. L-LPG huwa itqal mill-arja u jekk ikun hemm tnixxijja il-gass jakkumula f’livell baxx u jista’ jkun perikoluż f’każ ta’ preżenza ta’ fjamma.
- M’għandekx tipprova tenforza regolatur ta’ dimensjoni mod fuq valv ta’ ċilindru ta’ dimensjoni differenti. F’każ ta’ diffikultà ikkuntattja venditur jew installatur awtorizzat biex jiġi jispezzjoni ċ-ċilindru u r-regolatur.
- M’għandekx timmodifika tagħmir tal-gass. Ara dejjem li titlob il-parir ta’ venditur tal-gass u qatt tħalli persuna mhux kwalifikata tipprova timmodifika jew tagħmillek xi servizz fit-tagħmir tal-gass.
- M’għandekx tostakola l-aċċess għaċ-ċilindri.Żomm lilek innifsek aġġornat mal-blogg tagħna għal aktar informazzjoni dwar l-aktar modi sikuri kif tista’ tinstalla u tieħu ħsieb it-tagħmir tal-gass tiegħek.
